لاہور (سپورٹس رپورٹر+نمائندہ سپورٹس) بچوں کو گرائونڈز میں لانا اہم ہدف ہے،اگلے سال پنجاب گیمز بھی کروائیں گے، حکومت اور نجی شعبہ کو مل کر سپورٹس کے فروغ اور ترقی کے لئے کام کرنا ہوگا۔ ان خیالات کا اظہار ڈائریکٹر جنرل سپورٹس پنجاب ندیم سرور نے پنجاب سٹیڈیم میں یونیک گروپ آف سکولز کے سپورٹس گالا کی تقریب سے خطاب کرتے ہوئے کیا، پنجاب سٹیڈیم آمد پر مہمان خصوصی ڈی جی سپورٹس پنجاب ندیم سرور کا پرتپاک استقبال کیا گیا،اس موقع پر یونیک گروپ آف سکولز کی انتظامیہ، ڈائریکٹر سپورٹس محمد حفیظ بھٹی، شاہد فقیر ورک و دیگر بھی موجود تھے، ڈی جی سپورٹس پنجاب ندیم سرور نے کہا کہ سپورٹس بورڈ پنجاب کھیلوں کے بہت سے پروگرام شروع کررہا ہے، سالانہ سپورٹس کیلنڈر کے تحت صوبہ بھر میں انٹر تحصیل کی سطح پر لڑکے اور لڑکیوں کے کھیلوں کے مقابلے جاری ہیں، جس کے بعد ضلع کی سطح پر مقابلے ہوں گے، یکم جنوری سے مختلف شہروں میں 7 بڑی گیمزکے کیمپ لگائے جائیں گے، ان کیمپ میں شاندار کارکردگی کا مظاہرہ کرنے والے کھلاڑی سپورٹس ایسوسی ایشنز کو دیں گے جو ان کو ریجن اور نیشنل سطح پر کھیلنے کے مواقع فراہم کریں گی۔