کراچی (اسپورٹس رپورٹر)شاہ عبدالطیف بھٹائی SSBکپ باسکٹ بال ٹورنامنٹ میں مزید 2میچوں کے فیصلے ہوگئے۔پہلے میچ میں ممبا اسکواڈ نے مد مقابل میز بان عثمان کلب کو دلچسپ مقابلے کے بعد 48کے مقابلے میں 57باسکٹ پوائنٹس سے مات دیدی،فاتح کلب کی جانب سے طحہ خان نے 3تھری پوائنٹرز کی مدد سے 19اور سعد خان نے 15جبکہ رنر اپ کلب کی جانب سے حسن اقبال 15،حمزہ خواجہ 13، عثمان خواجہ نے 12 اور محمد دانیال مروت نے 8باسکٹ اسکور کرکے نمایاں کھلاڑی رہے۔دوسرے میچ میں کراچی باسکٹ بال کلب نے مد مقابل سول ٹائیگر کو 41کے مقابلے میں 56باسکٹ پوائنٹس سے شکست دیدی،فاتح کلب کی جانب سے راج کمار لکھوانی 18،سعد شمسی 16اور انجینئر زین العابدین چنہ نے 14جبکہ رنر اپ کلب کی جانب سے احسن محمد خان 13،محمد حارث 13اور محمد معاذ نے 10باسکٹ اسکور کرکے نمایاں رہے۔کھیلے گئے میچوں میں ریفریز کے فرائض زاہد ملک،ظفر اقبال،غلام محمد سنیئر،اشرف یحییٰ اور ٹیکنیکل آفیشلز ذعیمہ خاتون،نعیم احمد،ممتاز احمد اور عامر شریف تھے۔کھیلوں کے میچوں سے قبل محکمہ کھیل حکومت سندھ کے ایڈیشنل سیکریٹری ڈاکٹر شاکر قیوم خانزادہ سے کھلاڑیوں کا تعارف کرایا گیا اس موقع پر کراچی باسکٹ بال ایسوسی ایشن کے صدر غلام محمد خان،سندھ اولمپکس ایسوسی ایشن کے سیکریٹری احمد علی راجپوت اور دیگر موجود تھے۔