چٹاگانگ(آئی این پی) چٹاگانگ ٹیسٹ  میں پاکستانی بیٹنگ لائن کا  مڈل آرڈر بری طرح ناکا م ہو گیا اور پاکستانی ٹیم  تاج الاسلام کی تباہ کن بائولنگ کے باعث پہلی اننگز میں286رنز پر ڈھیر ہو گئی۔پاکستان کی جانب سے  عابد علی133،عبداللہ شفیق53 اور فہیم اشرف38رنز بنا کر نمایاں بلے باز رہے جبکہ بنگلہ دیش کی جانب سے  تاج الاسلام نے7پاکستانی کھلاڑیوں کو پویلین کی راہ دکھائی جبکہ عبادت حسین نے2اور مہدی حسن مرزا نے ایک وکٹ حاصل کی۔تیسرے روز کھیل ختم ہوا تو بنگلا دیش نے اپنی دوسری اننگز میں 4وکٹوں پر 39رنز بنا لئے، مشفیق الرحیم 12اور یاسر علی 8رنز کے ساتھ وکٹ پر موجود ہیں۔ پاکستان کی جانب سے 3وکٹیں شاہین شاہ آفریدی نے حاصل کیں جبکہ ایک کھلاڑی کو حسن علی نے شکار بنایا۔  بنگلہ دیش  کی مجموعی برتری 83رنز ہو چکی ہے جبکہ اسکی ابھی6وکٹیں باقی ہیں۔اتوار کو  چٹاگانگ کے ظہور احمد چوہدری اسٹیڈیم میں جاری پہلے ٹیسٹ کے تیسرے روزپاکستان نے بغیر کسی نقصان کے 145رنز سے شروع کیا تو پہلے ہی اوور میں اس کی 2 وکٹیں گر گئیں، دوسرے دن کے اختتام پر 52رنز پر ناٹ آئوٹ رہنے والے عبداللہ شفیق تیسرے روز بغیر کوئی اسکور بنائے ہی تاج الاسلام کا شکار ہوگئے، اگلی ہی بال پر اظہر علی بھی تاج الاسلام کا شکار بنے اور بغیر کھاتا کھولے ہی واپس لوٹ گئے، پاکستانی کپتان بابر اعظم صرف 10رنز بناسکے، انہیں مہدی حسن نے بولڈ کیا، فواد عالم بھی صرف 8رنز کے مہمان ثابت ہوئے اور انہیں بھی تاج الاسلام کے کیپر کے ہاتھوں کیچ آئوٹ کروا کر پویلین واپس بھیج دیا۔وکٹ کیپر بلے  باز محمد رضوان بھی بنگلہ دیشی بولرز کا سامنا نہ کرسکے اور صرف 5رنز بناکر عبادت حسین کے ہاتھوں ایل بی ڈبلیو آئوٹ ہوگئے، پاکستان کی جانب سے عابدعلی نے شاندار 133رنز بنائے، اور تاج الاسلام کے شکار بنے، حسن علی بھی بڑی شاٹ کھیلنے کی کوشش میں تاج الاسلام کو وکٹ دے بیٹھے، انہوں  12رنز بنائے اور اسٹمپ آئوٹ ہوئے، ساجد خان کو 5رنز پر عبادت حسین نے بولڈ کیا، نعمان علی بھی 8رنز بناسکے انہیں بھی تاج الاسلام نے شکار کیا، فہیم اشرف نے کچھ مزاحمت کرتے ہوئے 38رنز بنائے اور وہ بھی تاج الاسلام کی وکٹ میں اضافہ کرگئے، بنگلہ دیشی اسپنر تاج الاسلام نے اپنے کیرئیر کی بہترین بولنگ کراتے ہوئے 7پاکستانی کھلاڑیوں کو پویلین کی راہ دکھائی۔بنگلا دیشی بلے بازوں دوسری اننگز میں بھی اپنی ٹیم کو اچھا آغاز فراہم کرنے میں ناکام ثابت ہوئے اور ابتدائی 4بیٹر صرف 25رنز پر پویلین لوٹ گئے۔تیسرے روز کھیل ختم ہوا تو بنگلا دیش نے 4وکٹوں پر 39رنز بنا لیے تھے، مشفیق الرحیم 12اور یاسر علی 8رنز کے ساتھ وکٹ پر موجود ہیں۔ پاکستان کی جانب سے 3وکٹیں شاہین شاہ آفریدی نے حاصل کیں جبکہ ایک کھلاڑی کو حسن علی نے شکار بنایا۔  بنگلہ دیش  کی مجموعی برتری 83رنز ہو چکی ہے جبکہ اسکی ابھی6وکٹیں باقی ہیں۔