لاہور(سپورٹس رپورٹر) ویسٹ انڈیز کیخلاف ہوم سیریز کیلئے نیشنل ہائی پرفارمنس سنٹر کے بیٹنگ کوچ محمد یوسف کو عارضی ذمہ داریاں دینے پر غور کیا جا رہا ہے جبکہ نیشنل ہائی پرفارمنس میں بائولنگ کوچ کا خالی عہدہ پر کرنے کیلئے سابق فاسٹ بائولر عمر گل کو وقتی طور پر قومی ٹیم کیساتھ بائولنگ کوچ کی ذمہ داریاں دی جا سکتی ہیں۔ بیٹنگ کنسلٹنٹ میتھیو ہیڈن نے بھی ٹی ٹونٹی ورلڈ کپ تک خدمات انجام دیں جبکہ بائولنگ کنسلٹنٹ ورنن فلینڈر بنگلہ ٹیم سے الگ ہو جائیں گے۔ ویسٹ انڈیز کیخلاف ہوم سیریز میں بھی پاکستان ٹیم کا عارضی کوچنگ سیٹ اپ ہوگا، بیٹنگ اور بائولنگ کے عارضی کوچز کی تعیناتی کی جائیگی اور پی سی بی نے تقرریوں کے حوالے سے مشاورت بھی شروع کر دی ہے۔واضح رہے کہ ویسٹ انڈیز کی ٹیم وائٹ بال سیریز کیلئے 9 دسمبر کو کراچی پہنچے گی، سیریز میں تین ٹی ٹونٹی اور تین ون ڈے میچز شامل ہیں، قومی ٹیم کے مستقل کوچز کیلئے پاکستان کرکٹ بورڈ جلد اشتہار دیگا۔معاملے پر پاکستان کرکٹ بورڈنے تقرریوں کیلئے مشاورت شروع کردی ہے۔