38ویں مینز اور دوسری ویمنز نیشنل باکسنگ چیمپئن شپ کل سے شروع

لاہور(سپورٹس رپورٹر)پاکستان باکسنگ فیڈریشن کے زیر اہتمام 38 ویں مینز اور دوسری ویمنز نیشنل باکسنگ چیمپیئن شپ 30 نومبر سے پانچ دسمبر تک ڈی ایچ اے لاہور میں ہوگی۔ مینز12 جبکہ ویمنزسات کیٹگریز میں مقابلے ہونگے۔ اس بات کا اعلان پاکستان باکسنگ فیڈریشن کے صدر خالد محمود، سیکرٹری لیفٹیننٹ کرنل (ر) ناصر تنگ، ڈی ایچ اے لاہور کے ڈائریکٹر سپورٹس بریگیڈئر منیر احمد اور کرنل فاروق نے پریس کافنرنس کرتے ہوئے کیا۔ صدر فیڈریشن خالد محمود کا کہنا تھا کہ نیشنل چیمپیئن شپ کے تمام مقابلے آئیبا رولز کے تحت ہونگے، جس میں شریک باکسرز کے ڈوپ ٹیسٹ بھی لیے جائیں گے۔ خالد محمود کا کہنا تھا کہ پاکستان میں ایک ہی باکسنگ فیڈریشن ہے کوئی دوسری تنوازی تنظیم نہیں ہے۔ سیکرٹری فیڈریشن کرنل (ر) ناصر تنگ کا کہنا تھا کہ مجموعی طور پر 153 مقابلے ہونگے۔ ڈائریکٹر سپورٹس ڈی ایچ اے بریگیڈئر (ر) منیر احمد کا کہنا تھا کہ مختصر عرصہ میں دوسرے بڑے قومی ایونٹ کی میزبانی کرنے جا رہے ہیں۔