گورنمنٹ کالج یونیورسٹی میں ہیری پوٹر فیسٹیول,یونیورسٹی کیمپس جادوئی ہاگ وارٹس اسکول میں تبدیل

اس موسم سرما میں، گورنمنٹ کالج یونیورسٹی لاہور میں ہیری پوٹر فیسٹیول کا انعقاد، یونیورسٹی کا تقریباً ڈیڑھ سو سال پرانا کیمپس جادوئی ہاگ وارٹس سکول میں تبدیل۔ فیسٹیول 5 دسمبر تک جاری رہے گا جس میں پاکستان کی پہلی ہیری پوٹر فین فلم ''دی لاسٹ فالوور اینڈ دی ریسریکشن آف وولڈیمورٹ'' بھی نمائش کیلئے پیش کی جا رہی ہے۔یہ فلم جی سی یو کے طلباء کی جانب سے تیار کی گئی ہے اور اسے گورنمنٹ کالج یونیورسٹی لاہور میں ہی عکس بند کیا گیا ہے۔یہ فین فلم ہیری پوٹر سیریز کی آخری فلم ''دی ڈیتھلی ہیلوز پارٹـ2'' کی دس سال بعد ریلز کی جارہی ہے اور اس میں گورنمنٹ کالج کے طلباء نے دکھایا ہے کہ لارڈ وولڈیمورٹ کی موت کے برسوں بعد ہیری پوٹر کی دنیا میں کیا ہو رہا ہے۔جی سی یونیورسٹی لاہور کے طلباء کا ایک گروپ خیالی پروڈکشن نے یہ پاکستان کی پہلی ہیری پوٹر فین فلم بنائی ہے۔ وائس چانسلر پروفیسر ڈاکٹر اصغر زیدی نے فلم کی تیاری اور ریلیز کی مکمل سپورٹ کی بلکہ اس فلم کی تشہیری ویڈیوز میں بھی جوش و خروش سے حصہ لیا۔جی سی یونیورسٹی کے سابق طالب علم ولید اکرم اس فلم کے ہدایت کار، سنیماٹوگرافر اور ایڈیٹر ہیں۔ ولید کے مطابق اس آرٹ کو ہمارے ملک میں متعارف کروانے کا مقصد ہیری پوٹر کی جادوئی دنیا سے اپنی محبت کا اظہار کرنا تھا۔ مزید برآں، وہ کہتے ہیں، یہ فلم ہمارے نوجوانوں کی صلاحیت کی بھی عکاسی کرتی ہے جنہوں نے اسے انتہائی محدود وسائل کے ساتھ بنایا۔ انہوں نے کہا کہ انہوں نے 2018 میں پروجیکٹ پر کام شروع کیا تھا لیکن کوویڈ 19 نے دوبارہ شوٹنگ میں کچھ تاخیر کی۔ انہوں نے کہا کہ وہ دوبارہ شوٹنگ کے بعد اس فلم کا اپ ڈیٹ ورژن پیش کر رہے ہیں۔ وائس چانسلر پروفیسر زیدی نے کہا کہ ہمارے نوجوانوں کے پاس بہت زیادہ صلاحیت ہے اور ہمیں صرف انہیں مواقع فراہم کرنے کی ضرورت ہے۔ فلم کی مرکزی کاسٹ میں عمر ڈار، جازب اکرم، مریم حسن نقوی، طلحہ چہور، دعا مریم اور شیخ مبشر شامل ہیں۔ سپیشل ایفیکٹ ذیشان حمید نے کیے ہیں۔ ابراہیم حسن اس فلم کے ایسوسی ایٹ ڈائریکٹر اور پروڈکشن ہیڈ ہیں جبکہ شیخ مبشر اسسٹنٹ ڈائریکٹر اور پروڈکشن ہیڈ ہیں۔ حماد جاوید اس پروجیکٹ میں پروڈکشن اسسٹنٹ ہیں۔اس ہیری پوٹر فیسٹیول میں فلموں کی نمائش کے علاوہ ہیری پوٹر ہال، ہیری پوٹر کا تجارتی سامان، کھانے کے اسٹالز، فیس پینٹ اور پوسٹرز، فوٹو بوتھ اور دیگر کئی مہم جوئی شامل ہیں۔