لاہور ( سپورٹس رپورٹر) پیپلز پارٹی این اے 133 کے زیر اہتمام گزشتہ چار ہفتوں سے جاری’’شہید بے نظیر بھٹو ٹی ٹونٹی کرکٹ ٹورنامنٹ ‘‘ گرین ٹاؤن کی ٹیم ڈریم سٹارز الیون نے جیت لیا۔ پیپلز پارٹی کے رہنما فیصل میر نے اس ٹورنامنٹ کو سپانسر کیا۔ گزشتہ چار ہفتے سے جاری ٹورنامنٹ کے فائنل میچ میں پیپلز پارٹی کے سینئیر راہنما ڈاکٹر ضرار یوسف اور پیپلزپارٹی پنجاب کی ڈپٹی انفارمیشن سیکریٹری نایاب گوہر مہمانان خصوصی تھے جنہوں نے جیتنے والی ٹیم کو تیس ہزار روپے اور چیمپئن شپ ٹرافی دی۔ فائنل میں ہارنے والی ٹیم کو پندرہ ہزار روپے انعام اور رنر آپ ٹرافی دی گئی۔ اس موقع پر ٹورنامنٹ میں حصہ لینے والی تمام 16 ٹیمیں بھی موجود تھیں جن کے ہر کھلاڑی کو میڈل دئیے گئے اور سولہ ٹیموں کے کپتانوں کو پیپلز پارٹی کے مونو گرام والے بلے بھی انعام میں دئیے گئے۔