کراچی (اسپورٹس رپورٹر )ڈائریکٹر جنرل پارکس کے ایم سی جنید اللہ خان نے کہا ہے کہ بہت جلد الصغیر ہاکی اسٹیڈیم میں گراس لگادی جائے گی، کے ایم سی چاہتی ہے کہ کراچی کا ہر گراﺅنڈ تمام سہولیات سے آراستہ اور ہرا بھرا ہو۔انہوں نے الصغیر ہاکی اسٹیڈیم کے دورہ کے موقع پر گراﺅنڈ پر گراس لگانے کے احکامات جاری کئے جبکہ دیگر ضروری کام کرانے کا وعدہ بھی کیا۔انکا کہنا تھا کہ میدان آباد ہوں گے تو اسپتال ویران ہوں گے، بچوں کو صحت مندماحول فراہم کرنا ان کی اولین ترجیح ہے۔اس موقع پر ممبر صوبائی اسمبلی وسیم قریشی نے کہا کہ الصغیر ہاکی کلب کی وجہ سے ہی یہ ویران اسٹیڈیم آباد ہوا، ڈی سی سینٹرل طحہ سلیم کی کوششوں سے اسٹیڈیم میں فلڈ لائٹس کی سہولت میسر ہوئی۔ بعد ازاں جنید اللہ خان کا اسٹیڈیم میں جاری الصغیر انڈر 14ہاکی ٹورنامنٹ کے کھلاڑیوں سے تعارف کروایا گیا۔ مہمان خصوصی نے کھلاڑیوں میں انعامات بھی تقسیم کئے۔ اختتامی تقریب میں محمد عمران، سید صغیر حسین، عظمت پاشا، مسرور جاوید سمیت دیگر بھی موجود تھے۔