نیئر بخاری پی پی پارلیمنٹیرینزکے سیکرٹری جنرل مقرر، بلاول کراچی پہنچ گئے

اسلام آباد کراچی (نمائندہ خصوصی+ نوائے وقت رپورٹ) سابق صدر آصف علی زرداری نے نیئر حسین بخاری کو پیپلز پارٹی پارلیمنٹیرینز کا سیکرٹری جنرل مقرر کر دیا۔ نوٹیفکیشن جاری کر دیا گیا۔ نیئر بخاری نے سابق صدر آصف زرداری سے ملاقات کی۔ پارٹی امور اور سیاسی صورتحال پر تبادلہ خیال کیا گیا۔ یہ عہدہ فرحت اللہ بابر کے استعفیٰ کے بعد خالی تھا۔ نیئر بخاری نے پاکستان پیپلز پارٹی کے سیکرٹری جنرل کے عہدے سے استعفیٰ دے دیا ہے۔ ادھر پاکستان پیپلز پارٹی کا یوم تاسیس کل جمعرات 30 نومبر کو منایا جائے گا۔ اس سلسلے میں کوئٹہ میں جلسہ عام ہوگا، جلسہ میں شرکت کے لیے پاکستان پیپلز پارٹی کی قیادت ملک بھر سے کوئٹہ پہنچنا شروع ہو گئی ہے۔ سابق صدر آصف علی زرداری دبئی سے اسلام آباد پہنچ چکے ہیں، جب کہ وہ آج کسی وقت کوئٹہ کے لیے روانہ ہوں گے۔ ترجمان بلاول ہاؤس نے کہا بلاول بھٹو زرداری دبئی سے کراچی پہنچ گئے۔ سید نیر بخاری اور دیگر رہنما بھی کوئٹہ روانہ ہو رہے ہیں۔ یوم تاسیس کے جلسہ میں پارٹی اپنے سیاسی لائحہ عمل کا اعلان کرے گی۔ پی پی کے کارکنوں کی ٹولےاں بھی کوئٹہ روانہ ہو رہی ہےں۔