لاہور(سپورٹس رپورٹر)ناقابل شکست نمیبیا کو T20 ورلڈ کپ 2024 کا ٹکٹ مل گیا۔نمیبیا نے ٹی ٹونٹی ورلڈکپ افریقہ کوالیفائر میں پانچ میچوں میں پانچ جیت کے بہترین ریکارڈ کےساتھ میگا ایونٹ میں جگہ پکی کر لی۔ایگلز نے تنزانیہ کو 58 رنز سے شکست دے کر ویسٹ انڈیز اور امریکہ میں ہونے والے آئی سی سی مینز ٹی ٹونٹی ورلڈ کپ 2024 ءمیں جگہ بنانے پر مہر ثبت کر دی۔نمیبیا اس وقت 10 پوائنٹس کےساتھ ٹیبل میں سرفہرست ہے، تنزانیہ کے خلاف ان کی جیت نے اگلے سال ایونٹ کیلئے کوالیفائی کرنے کیلئے ٹاپ ٹو میں جگہ کو یقینی بنایا ہے۔یوگنڈا، کینیا، زمبابوے اور نائیجیریا اب بھی کوالیفائی کی جنگ لڑیں گے۔ یوگنڈا اور کینیا نے اپنی تقدیر اپنے ہاتھ میں رکھی ہے جبکہ زمبابوے اور نائیجیریا دوسرے میچوں کے نتائج پر انحصار کریں گے۔