نیشنل ٹی ٹونٹی کپ ‘لاہور بلوز سپر ایٹ مرحلہ میں پہنچ گئی 

لاہور(سپورٹس رپورٹر) کراچی میں جاری قومی ٹی ٹوئٹی کرکٹ ٹورنامنٹ کے اہم میچ میں لاہور بلو ز نے اسلام آباد ریجن کو 5رنز سے شکست دے کر ایونٹ کے سپر ایٹ مرحلے میں رسائی حاصل کرلی ہے اس کےساتھ ساتھ لاہور بلوز نے گروپ بی کے تمام چار میچز جیت کر پوائنٹس ٹیبل پر بھی پہلی پوزیشن پر قبضہ جما لیا ۔ گروپ بی کے اہم میچ میں لاہور بلوز نے 7وکٹوںپر 154رنز بنائے۔ قاسم اکرم نے 64، عمران بٹ نے 52اور شاہ ویزعرفان نے 14رنز کی اننگز کھیلی۔ عمیر آفریدی نے 3وکٹیں حاصل کیں۔ ہدف کے تعاقب میں اسلام آباد ریجن 19.4اوورز میں تمام وکٹوں پر 149بنا سکی۔ سرمد بھٹی نے 45رنز کی اننگز کھیلی۔ عثمان قادر نے 3کاشف بھٹی اور نثار احمد نے 2,2وکٹیں حاصل کیں۔ قاسم اکرم مین آف دی میچ قرار پائے ۔ شاندار جیت پر لاہور ریجن کرکٹ ایسوسی ایشن کے سربراہ خواجہ ندیم احمد نے لاہور بلوز کی پوری ٹیم اور ٹیم انتظامیہ کو مبارکباد دی اور امید ظاہر کی کہ لاہور بلوز کی ٹیم سپر ایٹ میں بھی اس کارکردگی کے تسلسل کو جاری رکھے گی اور قومی ایونٹ اپنے نام کرے گی۔