لاہور(سپورٹس رپورٹر ) قومی کرکٹ ٹیم کے دورہ جنوبی افریقہ کیلئے سکواڈز پر مشاورت حتمی مرحلے میں داخل ہوگئی۔ ذرائع کے مطابق ون ڈے سیریز کیلئے مضبوط سکواڈ ہو گا جس میں سابق کپتان بابراعظم سمیت فاسٹ بائولرز نسیم شاہ اور شاہین آفریدی کی واپسی ہوگی۔ چیمپئنز ٹرافی کو سامنے رکھتے ہو ئے فخر زمان کی ٹیم کو ضرورت قرار دیا گیا ہے لہذا وائٹ بال ٹیم میں فخر کی واپسی کا قوی امکان ہے۔جنوبی افریقہ کیخلاف 2ٹیسٹ میچز کی سیریز کے حوالے سے ذرائع کا کہنا ہے کہ ریڈ بال ٹیم کیلئے امام الحق کے نام پر بھی غور کیا جارہا ہے جبکہ ٹی ٹونٹی سیریز میں سینئر بیٹر اور بائولر ز کو آرام دیا جا سکتا ہے لہذا نوجوان کھلاڑیوں کو موقع دینے پر اتفاق کیا گیا ہے۔ذرائع کا بتانا ہے کہ زمبابوے کیخلاف ون ڈے سیریز کے اختتام یا پہلے ٹی ٹونٹی میچ کے بعد سکواڈز کا اعلان متوقع ہے جبکہ ٹیسٹ کھلاڑیوں کا ٹریننگ کیمپ جنوبی افریقہ میں لگانے کی منصوبہ بندی بھی جاری ہے۔ پاکستان ٹیم نے جنوبی افریقہ میں 3ون ڈے ،3ٹی ٹونٹی اور 2ٹیسٹ میچز کی سیریز کھیلنی ہے۔