امریکہ کے 134 سکھ یاتریوں کی ننکانہ آمد، رسومات ادا کیں 

ننکانہ  (نامہ نگار) پنجابی سوسائٹی آف امریکہ کے 134 رکنی سکھ یاتریوں کے وفد نے جتھہ لیڈر سردار گیری سکا کی قیادت میں بابا گورونانک کی جائے پیدائش گوردوارہ جنم استھان ننکانہ  کا دورہ کیا اور وہاں اپنی مذہبی رسومات ادا کیں۔ تفصیلات کے مطابق امریکہ سے آئے سکھ یاتریوں کا گوردوارہ جنم استھان پہنچنے پر مقامی سکھ رہنمائوں اور بابا گورونانک کے قریبی مسلمان ساتھی رائے بلار بھٹی فیملی کے رائے بلال اکرم بھٹی کی طرف سے شاندار استقبال کیا گیا۔  سکھ یاتریوں نے بابا گورونانک کی جائے پیدائش پر متھا ٹیکی اور ارداس سمیت دیگر مذہبی رسومات ادا کیں۔ انہوں نے  بہترین انتظامات اور شاندار مہمان نوازی پر حکومت پاکستان اور رائے بلال اکرم بھٹی کا شکریہ ادا کیا۔ سکھ یاتریوں نے کہا  پاکستان آکر دلی خوشی ہوئی۔ حکومت پاکستان کی طرف سے سکھ یاتریوں کے لئے آسان ترین طریقے سے فری آن لائن ویزا پالیسی ایک اور بڑا تحفہ ہے جس سے سکھ یاتریوں کا پاکستان آنے کا خواب پورا ہونے میں بہت آسانی ہوگی۔