کوئٹہ (بیورو رپورٹ + نوائے وقت رپورٹ) آئی ایس پی آر نے کہا ہے کہ دہشت گردوں نے پنجگور میں ایف سی کے قافلے پر حملہ کیا۔ دہشت گردوں کی فائرنگ سے ایف سی کے 4 جوان جاںبحق اور 3 زخمی ہو گئے۔ ایف سی کے جوان زلزلہ متاثرین کے لئے راشن لے جا رہے تھے۔بیورو آفس کے مطابق پروم میں جھڑپ کے دوران جوابی کارروائی میں 6 حملہ آور ہلاک ہو گئے۔ انسپکٹر جنرل فرنٹیئر کور بلوچستان میجر جنرل اعجاز شاہد نے فرنٹیئر کور کے جوانوں کی کامیاب کارروائی کو سراہتے ہوئے کہا کہ ایف سی صوبے میں قیام امن تک تمام وسائل کو بروئے کار لاتے ہوئے دہشت گردوں اور ملک دشمن عناصر کے خلاف بھرپور کارروائی کرے گی۔ واقعہ کے بعد علاقے میں سرچ آپریشن کیا گیا ہے۔ علاوہ ازیں ضلع گوادر میں ایف سی اور پولیس نے مشترکہ آپریشن کرکے 11 افراد گرفتار کر لئے۔گرفتار افراد میں سے 7 افراد غیر قانونی طور پر یورپ جا رہے تھے اور 4 افراد پر یہ الزام عائد کیا گیا ہے کہ یہ 7 افراد کو غیر قانونی طور پر یورپ بجھوانے پر ان کی مدد کر رہے تھے۔علاوہ ازیں آواران سے کوئٹہ بذریعہ سڑک آنے والی گاڑی پر نامعلوم افراد نے ماشکیل کے قریب فائرنگ کردی جس سے خاتون سمیت دو افراد زخمی ہوگئے جبکہ ڈیرہ بگٹی میں بارودی سرنگ دھماکے میں ایک خاتون جاں بحق ہوگئی۔علاوہ ازیں کوئٹہ سے اغواءہونے والے ماہر امراض قلب ڈاکٹر مناف ترین کے اغواءکے خلاف ڈاکٹروں نے بلوچستان اسمبلی کے سامنے احتجاجی مظاہرہ کیا۔
پنجگور حملہ