جڑانوالہ: چودھریوں نے بکریاں چرانے والے 13 سالہ بچے پر کتے چھوڑ دئیے

جڑانوالہ (نامہ نگار+ این این آئی) با اثر چوہدریوں نے کھیتوں میں بکریاں چرانے کے جرم میں 13 سالہ بچے پرکتے چھوڑ دئیے۔ معصوم بچے کی دلخراش چیخیں سن کر چوہدری کتوں کو ”ہلا شیری “ دیتے اور بچے کو نوچنے کا تماشہ دیکھتے رہے ۔نواحی گاﺅں 120/ گ ب کا 13 سالہ شان بکریاں چراتا ہوا غلطی سے چوہدری ضیا اور چوہدری زبیر کے کھیتوں کی طرف چلا گیا ۔کھیتوں میں بکریاں چرتی دیکھ کر چوہدری آگ بگولا ہو گئے۔کتوں نے معصوم شان کو بھنبھوڑ دیا۔ سنگدل چوہدریوں کو اس پر ترس نہ آیا اور وہ بچے کی چیخوں سے لطف اندوز ہوتے اور قہقہے مارتے رہے۔ بالآخر گاﺅں کے کچھ لوگوں نے شان کو کتوں سے نجات دلائی اور زخمی حالت میں تحصیل ہیڈ کوارٹر ہسپتال لے آئے۔ پولیس نے تحقیقات کا آغاز کر دیا جبکہ بااثر چوہدری شان کے ورثاءکو مسلسل دھمکیاں دے رہے ہیں اور پولیس کارروائی سے بازرہنے کا کہہ رہے ہیں۔