کراچی(اسپورٹس رپورٹر)ٹاپ سیڈ ریان جواد نے ایک سخت مقابلے کے بعد یحییٰ احتشام کو شکست دے کر5 ویںانڈس فارما قومی جونیئر اینڈ سنئیر ٹینس چمپئین شپ کا بوائز انڈر14 سنگلز ٹائیٹل اپنے نام کرلیا، کراچی جیمخانہ پر جاری چیمپئن شپ کے انڈر14 کے فائنل مین ریان جواد نے اپنے حریف کو 7-5 اور 7-5 سے ٹھکانے لگا کر کامیابی پائی، بوائز انڈر12 سنگلز ایونٹ پر مہاتیر محمد نے قبضہ جمایا ، انہوں نے فائنل میں مد مقابل اشعر محمد کو سخت جدوجہد کے بعد8-7 سے مات دی، نعمان آفتان نے حسن فاروق کو6-4 سے قابو کرکے بوائز انڈر18 سنگلز ایونٹ کے فائنل میں جگہ بنالی جہاں ان کامقابلہ فیوریٹ صاحبزادہ محمد علی سے ہوگا۔ پلس 35ڈبلز ایونٹ کے کوارٹر فائنل میں کریم گل آغا اور پاشا جی کی جوڑی نے خالد ملک اور شجاع الدین کو ایک آسان مقابلے میں6-1 اور 6-1 سے زیر کرلیا، کامران علی اور ان کے ساتھی خالد علی نذر نے شکیب اور یاسر خان کو تگ و دو کے بعد 6-4 اور 6-4 سے ناکام کیا، اسد علی بھگت اور رضا علی مرزا نے کریم گل اور پاشا جی کے پیئر کو صرف ایک پوائنٹ کی قربانی دے کر6-0 اور 6-1 سے ٹھکانے لگا دیا، عباد سرور حسین ایک سخت مقابلے کے بعد کامران کو شکست دے کر سافٹ ٹینس کے مینز ایونٹ کے فائنل میں پہنچ گئے، انہوں نے اپنے حریف کو5-3 سے مات دی، دوسرے سیمی فائنل میں رابن داس نے کسی دقت کے بغیر سعد محمد علی کو5-0 سے زیرکرکے ٹرافی پر نظریں مرکوز کر دی، سافٹ ٹینس کے ویمنز ایونٹ کے را?نڈ رابن لیگ مقابلے میں ٹاپ سیڈ حانیہ نوید نے اجالہ کو ایک آسان مقابلے میں 5-0 سے زیر کرلیا، افسرہ نے رخسانہ کو ایک پوائنٹ بھی نہ دیتے ہوئے5-0 سے شکست دیدی ، چیمپئن شپ کے فائنلز اور اختتامی تقریب آج کو منعقد ہوگی، اس موقعہ پر سندھ کے وزیر کھیل سردار محمد خان بخش مہر مہمان خصوصی ہوں گے۔