لاہور(سپورٹس رپورٹر) نیوزی لینڈ کی ٹیم سری لنکا کیخلاف دوسرے ٹیسٹ میچ میں فالو آن کا شکار ہونے کے بعد بھی سنبھل نہ سکی اور اس کی دوسری اننگز میں 199 کے سکور پر 5 وکٹیں گر گئیں۔گال میں جاری ٹیسٹ کے تیسرے روز نیوزی لینڈ نے سری لنکا کی پہلی اننگز 602 رنز کے جواب میں اننگز دوبارہ شروع کی تو پوری ٹیم 88 رنز پر ڈھیر ہو گئی اور اسے فالو آن کی خفت کا سامنا کرنا پڑا ، مچل سینٹنر 29 رنز کیساتھ ٹاپ سکورر رہے ، پرباتھ جے سوریا نے 6 وکٹیں حاصل کیں ، فالو آن کے بعد بھی کیوی بیٹرز دوسری اننگز میں ناکام رہے اور 199 رنز پر 5 وکٹیں گر گئیں ، ڈیون کونوے 61 ، کین ولیمسن 46 ، ریچن روندرا 12 ، ڈیرل مچل ایک اور ٹام لیتھم بغیر کوئی رن بنائے پویلین لوٹ گئے ، ٹام بلنڈل 47 اور گلین فلپس 32 رنز کیساتھ وکٹ پر موجود ہیں ، نشان پیرس نے تین کھلاڑیوں کو آؤٹ کیا ، نیوزی لینڈ کو اننگز کی شکست سے بچنے کیلئے مزید 315 رنز درکار ہیں۔