نیویارک (این این آئی) یوکرائن کے صدر ولادیمیر زیلنسکی نے امریکہ کے صدارتی امیدوار اور سابق صدر ڈونلڈ ٹرمپ سے خصوصی ملاقات کی جس میں روس یوکرائن جنگ سے متعلق انتہائی اہم گفتگو کی گئی۔غیرملکی خبررساں ادارے کے مطابق مین ہٹن کے ٹرمپ ٹاور میں ہونے والی یہ ملاقات ایک بند کمرے میں ہوئی جس میں زیلنسکی نے ٹرمپ کو جنگ میں فتح کیلئے اپنی حکمت عملی سے متعلق آگاہ کیا۔ سال 2019 کے بعد دونوں رہنماں کی یہ پہلی براہ راست ملاقات تھی۔ ڈونلڈ ٹرمپ نے ولادیمیر زیلنسکی کو یقین دلایا کہ وہ یوکرائن اور روس دونوں کے ساتھ مل کر اس تنازع کے خاتمے کیلئے ہر ممکن اقدام کریں گے۔ملاقات کے بعد میڈیا سے گفتگو کرتے ہوئے زیلنسکی نے کہا کہ وہ اس حوالے سے ٹرمپ اور ان کی ڈیموکریٹک حریف نائب صدر کملا ہیرس سے بھی بات کر رہے ہیں کیونکہ یوکرائن کو روس کے ساتھ جاری جنگ میں امریکہ کی مضبوط حمایت کی شدید ضرورت ہے، ملاقات کے بعد زیلنسکی نے ٹرمپ کے ساتھ اپنی اس بات چیت کو  نتیجہ خیز قرار دیا۔