اسلام آباد: وفاقی دارالحکومت میں سیو غزہ مہم کے تحت پریس کلب کے باہر نکالی گئی ریلی کے دوران جماعت اسلامی کے سابق سینیٹر مشتاق احمد اور ان کی اہلیہ سمیت 10 افراد کو گرفتار کیا گیا۔ اسلام آباد پولیس نے پریس کلب کے باہر سے سابق سینیٹر مشتاق احمدسمیت دیگر 10 مظاہرین کو گرفتار کیا اور پھر سینیٹر مشتاق احمد کی اہلیہ کو بھی حراست میں لے لیا۔پولیس کی جانب سے گرفتار کیے گئے افراد میں خواتین اور ایک بچہ بھی شامل ہے۔  سابق سینیٹر مشتاق احمد کی زیرقیادت ریلی اسرائیلی مظالم کے خلاف نکالی گئی تھی اور سیو غزہ مہم کے سلسلے میں سینیٹر مشتاق احمد کی ریلی پریس کلب کے باہر پہنچی. جس میں خواتین اور بچے بھی شریک تھے۔ریلی کے پیش نظر پولیس نے پریس کلب سے ڈی چوک جانے والے راستے بند کردیے اور پولیس کی بھاری نفری تعینات کردی گئی. سنیٹر مشتاق کی قیادت میں مظاہرین ڈی چوک میں احتجاج کرنا چاہتے تھے۔وفاقی دارالحکومت کی پولیس نے ریلی کو روکنے کے لیے ریڈ زون کو پہلے ہی سیل کر رکھا تھا۔سیوہ غزہ کمپین کے تحت یہ پہلا موقع نہیں ہے کہ جب پولیس نے مشتاق احمد خان اور ان کی اہلیہ کو گرفتار کیا ہو۔مشتاق احمد خان جماعت اسلامی کے سابق سینیٹر ہیں اور وہ غزہ پر اسرائیل کی وحشیانہ کارروائیوں کے خلاف احتجاجی مہم جاری رکھے ہوئے ہیں۔ اس دوران انہوں نے اسلام آباد کے ڈی چوک میں دھرنا بھی دیا۔