کراچی (نوائے وقت رپورٹ+ آئی این پی) کراچی کے علاقے پاک کالونی میں فائرنگ سے جاں بحق کی شناخت ہو گئی۔ مقتول کی شناخت ملک نسیم کے نام سے ہوئی جو پولیس میں ہیڈکانسٹیبل تھا۔ سپر ہائی وے پر حساس ادارے نے کارروائی کے دوران گینگ وار کے اہم کردار فیصل پٹھان کو تین خواتین اور چار ساتھیوں سمیت گرفتار کر لیا۔ ان میں سرور بلوچ بھی شامل ہے جو پولیس کو متعدد اہم مقدمات میں مطلوب تھا۔ کراچی کے علاقے جیکسن میں مبینہ پولیس مقابلے کے دوران گینگ وار کا ایک ملزم ہلاک ہو گیا جس کا تعلق سجاد کھتری گروپ سے تھا۔ فیروز آباد تھانے کی حدود میں بھی مبینہ پولیس مقابلے کے دوران پولیس نے سٹریٹ  کرائم کے دو ملزمان کو زخمی حالت میں گرفتار کر کے اسلحہ مسروقہ موبائل فون اور مسروقہ موٹر سائیکل برآمد کر لی۔