کراچی: جلسے سے قبل پی پی کیخلاف بینرز، وال چاکنگ متحدہ سیاسی طریقے سے مقابلہ کرے، سعید غنی

کراچی(سٹاف رپورٹر) لیاقت آباد میں پیپلز پارٹی کے جلسے سے قبل گذشتہ شب مختلف مقامات پر نامعلوم افراد نے پیپلز پارٹی کے خلاف بینرز لگائے اور وال چاکنگ بھی کی۔ ان بینرز پر کراچی کی معاشی بدحالی کی ذمہ دار پیپلز پارٹی ، قاتل قاتل پیپلز پارٹی قاتل ، کراچی کو کچرے کا ڈھیر بنانے والی پیپلز پارٹی، مہاجروں کی قاتل پیپلز پارٹی لکھا گیا تھا جبکہ ان بینرز پر نعروں کے ساتھ منجانب اہلیان کراچی ، تاجر برادری، اہلیان ایف سی ایریا لیاقت آباد تحریر تھا۔ ان بینرز کی اطلاعات ملتے ہی پولیس حرکت میں آ گئی اور پولیس نے ان بینرز کو فوراً ہٹا دیا۔ بینرز کے حوالے سے پیپلز پارٹی کراچی کے صدر سعید غنی نے میڈیا سے گفتگو کرتے ہوئے کہا کہ کراچی میں اب نامعلوم افراد کی سیاست نہیں چلے گی۔ انہوں نے ان بینرز کو لگانے کا الزام ایم کیو ایم پر لگایا اور کہا ایم کیو ایم کو اردو بولنے والوں اور لیاقت آباد کے عوام نے مسترد کر دیا ہے۔ کراچی کی تباہی کی ذمہ دار ایم کیو ایم ہے۔ ایم کیو ایم کو ہم سے مقابلہ کرنا ہے تو سیاسی طریقے سے کرے۔ اوچھے ہتھکنڈے استعمال نہ کرے۔