فخر زمان کی شاندار سنچری: پاکستان نے نارتھمپٹن شائر کو 8 وکٹوں سے شکست دیدی

نارتھمپٹن (سپورٹس ڈیسک)پاکستان نے دوسرے ٹور میچ میں نارتھمپٹن شائر کو 8وکٹوں سے ہرادیا۔نارتھمپٹن میں کھیلے گئے میچ میں نارتھمپٹن شائر نے پہلے بازی کرتے ہوئے جوش کوب کے ناقابل شکست 146رنز کی مدد سے 273رنز بنائے۔انہوں نے 145گیندوں کا سامنا کیا ۔ جوش کی اننگز میں 12چوکے اور 6شاندار چھکے بھی شامل تھے‘دیگر بلے باز نمایاں کارکردگی دکھانے میں ناکام رہے۔لیوی میچ کی پہلی بال پر بغیر کوئی رن بنائے محمد عامر کے ہاتھوں بولڈ ہوگئے۔ کیورن کو 23کے انفرادی سکور پر محمد حسنین نے پویلین کی راہ دکھائی۔واسکونسیلوس ایک رنز بنا کر ریٹائرڈ ہرٹ ہوئے‘تھورسٹن25‘زیب ایک‘ہولینڈ 9‘سول22‘ ہوٹن 27رنز بنا سکے۔ مہمان ٹیم کی جانب سے محمد عامر‘جنید‘حسنین‘عماد‘یاسر اور حارث سہیل نے ایک ‘ایک وکٹ حاصل کی۔جواب میں گرین شرٹس نے ہدف 9اوور قبل ہی حاصل کرلیا ۔ پاکستان کی جانب سے اوپنرز نے شاندار کھیل پیش کیا۔ فخرزمان نے81گیندوں پر 101رنز بنائے ان کی اننگز میں 15چوکے اور ایک چھکا شامل تھا۔امام الحق نے بھی 79گیندوں پر 71رنز جوڑے۔ بابر اعظم 53گیندوں پر 68‘سرفراز 30رنز کے ساتھ ناقابل شکست رہے۔نارتھمپٹن شائر کی جانب سے بک نے اور ہولینڈ ایک ایک وکٹ حاصل کرنے میں کامیاب رہے۔