قومی ٹیم ورلڈ کپ جیتنے کی صلاحیت رکھتی ہے:محسن خان

لاہور ( سپورٹس رپورٹر ) پی سی بی کرکٹ کمیٹی کے چیئرمین محسن حسن خان کا کہنا ہے کہ قومی ٹیم ورلڈکپ جیتنے کی بھرپور صلاحیت رکھتی ہے اور میگا ایونٹ میں میرٹ کا خیال رکھا گیا تو پاکستان ضرور جیتے گا۔ میڈیا سے گفتگوکرتے ہوئے کرکٹ کمیٹی کے چیرمین محسن حسن خان کا کہنا تھا کہ کوئی ممبر کچھ بھی کہے کرکٹ کمیٹی کا وجود ہے اور میں پی سی بی کی کمیٹی کا چیئرمین ہوں، چیئرمین بورڈ سے جب بھی بات ہوتی ہے وہ کمیٹی کے بارے میں ضرور پوچھتے ہیں۔ محسن حسن خان نے کہا کہ ڈیپارٹمنٹ کرکٹ کا پاکستان میں ہمیشہ سے اہم کردار رہا ہے، میں خود ڈیپارٹمنٹل ٹیم سے کھیلتا تھا، جلد چیئرمین پی سی بی سے ملاقات متوقع ہے اور احسان مانی سے ملاقات کے بعد ہی ڈیپارٹمنٹ کرکٹ کے حوالے سے اصل تصویر منظر عام پر آئے گی اور ملاقات کے بعد ڈیپارٹمنٹل کرکٹ پر اپنا نقطہ نظر پیش کروں گا۔ورلڈکپ کے حوالے سے انہوں نے کہا کہ قومی ٹیم ورلڈکپ جیتنے کی بھرپور صلاحیت رکھتی ہے، ورلڈکپ میں میرٹ کا خیال رکھا گیا تو پاکستان ضرور جیتے گا۔