پہلی پاکستان جونیئر ٹی ٹونٹی لیگ یکم اکتوبر سے لاہور میں شروع

لاہور(سپورٹس رپورٹر) پاکستان جونیئر لیگ کے اپکسپریشن آف انٹریسٹ میںسپانسرز اور پارٹنرز کی جانب سے بھرپور دلچسپی ظاہر کرنے پر پاکستان کرکٹ بورڈ نے پہلی جونیئر لیگ کی تفصیلات کا اعلان کردیا ہے۔چھ شہروں سے منسوب فرنچائز ٹیموں پر مشتمل ٹورنامنٹ یکم سے 15 اکتوبر تک قذافی سٹیڈیم لاہور میں کھیلا جائیگا۔ مجموعی طور پر 19 میچز کھیلے جائیں گے۔پاکستان جونیئر لیگ کیلئے  کھلاڑیوں کا انتخاب ڈرافٹنگ کے ذریعے کیا جائیگا۔ ہر ڈریسنگ روم میں ایک شہرہ آفاق کرکٹر بحیثیت مینٹور یا کوچ موجود ہوگا۔انڈر 19 کی سطح پر یہ اپنی نوعیت کی پہلی ٹی ٹونٹی لیگ ہوگی جہاں ملکی اور غیرملکی نوجوان کرکٹرز شرکت کریں گے۔ پاتھ وے کرکٹ پروگرام کے تحت پی سی بی اور اس کے دو شراکت داروں، بی آر بی گروپ اور اینگرو کارپوریشن نے 100 باصلاحیت نوجوان کھلاڑیوں کو تعلیمی سکالرشپ اور غیرملکی کوچز سے تربیت کے علاوہ 30 ہزار روپے ماہوار وظیفہ کا اعلان بھی کررکھا ہے۔