سپین کے ڈینی پیڈروسا نے موٹوجی پی موٹرسائیکل چیمپئن شپ کی یوایس اے گراں پری جیت لی۔

امریکی شہر انڈیاپولیس میں ہونے والی ریس میں ہونڈا رائیڈر ڈینی پیڈورسا نے مقررہ فاصلہ سینتالیس منٹ اور اکتیس اعشاریہ چھ ایک پانچ سیکنڈز میں طے کرکے کامیابی حاصل کی۔ امریکہ کے بین سپیز چار سیکنڈز کے فرق کے ساتھ دوسرے نمبر پررہے جبکہ پوائنٹس لینڈر سپین کے جارج لورینزو نے سات سیکنڈز کے فرق کے ساتھ تیسری پوزیشن حاصل کی۔
اس مرحلے کے اختتام پر جارج لورینزو دو سو اکاون پوائنٹس کے ساتھ بدستور پہلی پوزیشن پر موجود ہیں۔ ڈینی پیڈورسا ایک سو تراسی پوائنٹس کے ساتھ دوسرے اور اٹلی کے اینڈریاس ڈووی زیوسو ایک سو چھبیس پوائنٹس کے ساتھ تیسرے نمبر پر ہیں۔