لاہور(سپورٹس رپورٹر+نمائندہ سپورٹس) پاکستان کرکٹ بورڈ کے نئے چیئرمین کے انتخاب سے قبل پی سی بی ایچ آر ڈیپارٹمنٹ نے مختلف شعبوں میں کام کرنے والے کھلاڑیوں کی فہرست تیار کرنا شروع کر دی ہے۔ اس فہرست میں ان لوگوں کے ناموں کے آگے کالم میں یہ بھی واضح کیا جا رہا ہے کہ کس افسر اور ملازم کا سفارشی کون ہے۔ ذرائع کا کہنا ہے کہ گذشتہ روز پی سی بی ہیڈکوارٹر میں نئے متوقع افسران کی آمد کے حوالے سے ان کے کمروں کی صفائی ستھرائی کا کام شروع کر دیا گیا ہے۔ اس سلسلہ میں پی سی بی کے پریس کانفرنس روم میں بھی رنگ روغن کا کام مکمل کر لیا گیا ہے۔ ذرائع کا کہنا ہے کہ سابق چیئرمین نجم سیٹھی کی قربت کی وجہ سے بورڈ میں جگہ بنانے والے افراد نے نئے متوقع چیئرمین پی سی بی کے لیے اپنے سفارشی افراد کو ایک مرتبہ پھر تیار رہنے کی درخواست کر دی ہے تاکہ بورڈ میں ان کی نوکریاں بچی رہیں۔ سفارشی ملازمین نے نوکریاں بچانے کیلئے بھاگ دوڑ شروع کر دی ہے ۔