کاروباری ضوابط کو آسان بنانے کیلئے ریگولیٹری گیلوٹین پروگرام شروع کردیا،مشیرتجارت

اسلام آباد(نمائندہ خصوصی) عالمی بینک گروپ، انٹرنیشنل فنانس کوآپریشن (آئی ایف سی) کے وفد نے وزیر اعظم کے مشیر برائے تجارت، ٹیکسٹائل، صنعت و پیداوار، اور سرمایہ کاری عبدالرزاق داؤد سے ملاقات کی۔ جس میں مینوفیکچرنگ سے متعلق امور پر تبادلہ خیال کیا گیا۔ وفد کی سربراہی محترمہ رانا کراڈشاہحداد، ریجنل انڈسٹری ڈائریکٹر مینوفیکچرنگ، ایگری بزنس اینڈ سروسز ایشیاء اینڈ پیسیفک کررہی تھی۔ڈائریکٹر نے وزیر اعظم کے مشیر کو آگاہ کیا کہ پاکستان زرعی کاروبار اور خدمات میں آئی ایف سی منصوبوں کے لئے ترجیحی ملک ہے اور ان علاقوں میں سرمایہ کاری کو راغب کرنے کے لئے آئی ایف سی نے اس سلسلے میں مختلف منصوبے شروع کیے ہیں۔ اس سلسلے میں آئی ایف سی مقامی اور غیر ملکی کمپنیوں کو ترجیحی شعبوں میں جانے میں مدد فراہم کرکے سرکاری اور نجی شعبے کو تکنیکی اور مالی مشاورتی خدمات فراہم کررہی ہے۔وزیر اعظم کے مشیر نے بتایا کہ پاکستان میں فوڈ پروسیسنگ، بجلی، ٹیکسٹائل، چمڑے اور چاول کے شعبے میں بہت زیادہ کاروباری صلاحیت موجود ہے جس کا اب تک بہتر استحصال نہیں کیا گیا ہے، اسی وجہ سے اسی شعبوں کی پیداوار میں قدر میں اضافہ نہیں ہوا۔مشیر تجارت کا مزید کہنا تھا کہ پاکستان نے کاروباری ضوابط کو آسان بنانے کے لئے ریگولیٹری گیلوٹین کے نام سے ایک پروگرام شروع کیا ہے۔ اس پروگرام کے ذریعے کاروباری سرگرمیوں کو آسان بنانے کے لئے ہر ماہ 2 سے 3 قواعد و ضوابط کو ہٹا دیا جاتا ہے۔ انہوں نے یہ بھی کہا کہ پاکستان نے بہتر تجارتی سہولت حکومت قائم کرکے تجارتی طریقہ کار کو بہتر بنانے کے لئے مختلف موثر اقدامات کئے ہیں۔