کراچی (نوائے وقت رپورٹ) صدر مسلم لیگ (ن) اور قومی اسمبلی میں قائد حزب اختلاف شہباز شریف نے مرنے سے پہلے بدلا ہوا کراچی دیکھنے کی خواہش کا اظہار کیا ہے۔ کراچی کے حلقہ این اے 249 کے عمائدین، پارٹی عہدیداروں اور اہل علاقہ سے ملاقات کے دوران شہباز شریف کراچی کے مسائل کا ذکر کرتے ہوئے آبدیدہ ہو گئے۔ شہباز شریف نے کہا کہ کماؤ شہر کراچی کے ساتھ سوتیلی ماں جیسا سلوک ہو رہا ہے۔ کراچی کی خوشحالی کے بغیر پاکستان خوشحال نہیں ہو گا۔ کراچی کے مسائل کو دیکھ کر دل خون کے آنسو روتا ہے۔ دعا ہے میرے مرنے سے پہلے کراچی شہر بدل جائے۔ آئندہ الیکشن میں موقع ملا تو کراچی کی قسمت بدل دیں گے۔ نواز شریف نے کراچی کا امن لوٹایا اور اندھیرے ختم کیے۔ ہمیں موقع ملا تو کراچی کو سنواریں گے اور اسے مسائل سے پاک شہر بنائیں گے۔ ایک جماعت نے تین سال ملک و قوم پر صرف ظلم ڈھایا ہے۔