لاہور (نیوز رپورٹر + صباح نیوز) وزیر جیل خانہ پنجاب فیاض الحسن چوہان نے کہا ہے کہ  بلاول بھٹو عثمان بزدار کو کٹھ پتلی کہنے سے پہلے اپنے گریبان میں جھانکیں۔ بلاول بھٹو زرداری کے بیانات پر ردعمل میں انہوں  نے کہا کہ بلاول زرداری کچی عمر میں آصف زرداری سے منفی سیاست کے سارے گر سیکھ چکے ہیں۔ وزیراعلیٰ پنجاب نے اپنی پرفارمنس سے تمام وزرائے اعلیٰ کومات دی۔ موروثی سیاست کی پیداوار بلاول عثمان بزدار کو کٹھ پتلی کہنے سے پہلے اپنے گریبان میں جھانکیں۔ مراد علی شاہ کے سندھ اور عثمان بزدار کے پنجاب میں زمین آسمان کا فرق ہے۔ دریں اثناء نیوز رپورٹر سے مطابق ترجمان حکومت پنجاب فیاض الحسن چوہان نے کہا ہے کہ خواتین کے خلاف جنسی جرائم اور تشدد کی مئوثر روک تھام کے حوالے سے پنجاب حکومت اور پنجاب پولیس کی جانب سے "ویمن سیفٹی ایپ" آئی جی پنجاب انعام غنی کی زیر قیادت ایک جدید اور موزوں اقدام ہے۔ فیاض الحسن چوہان نے ایپ سے متعلق بتایا کہ گوگل پلے سٹور اور ایپل سٹور پر دستیاب اس ایپ کے ذریعے خواتین ایمرجنسی صورتحال میں ایپ میں خصوصی بٹن دبا کر پولیس کی مدد حاصل کر سکیں گی۔ فون کال اور میسج کے ذریعے بھی خواتین دیگر معاملوں میں رہنمائی حاصل کر سکتی ہیں۔