سینٹ کٹس(وائس آف ایشیا)کیربیئن پریمیئر لیگ میں بارباڈوس رائلز نے جمیکا تلاواز کو 15 رنز سے ہرا دیا، جمیکا کی ٹیم 162 رنز کا ہدف حاصل کرنے میں ناکام رہی، ریمن ریفر کو شاندار آل رائونڈ کارکردگی پر مرد میدان قرار دیا گیا۔ لیگ کے چھٹے میچ میں بارباڈوس رائلز نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 161 رنز بنائے، گلین فلپس نے 56 رنز کی ناقابل شکست اننگز کھیلی، آخر میں ریمن ریفر نے 31 رنز کی جارحانہ اننگز کھیل کر ٹیم کی پوزیشن کو مستحکم کر دیا۔ ویراسیمی پرموئل نے دو وکٹیں حاصل کیں۔ جمیکا تلاواز کی ٹیم مطلوبہ ہدف حاصل کرنے میں ناکام رہی اور اس نے مقررہ 20 اوورز میں 9 وکٹوں کے نقصان پر 146 رنز بنائے۔ شمرا بروکس 47 رنز کے ساتھ ٹاپ سکورر رہے۔ ریمن ریفر نے تین جبکہ محمد عامر اور تھسرا پریرا نے دو، دو وکٹیں حاصل کیں۔ ریمن ریفر کو مرد میدان قرار دیا گیا۔