ستلج میں ریلا، بہاولپور، احمدپور شرقیہ کیک متعدد دیہات ڈوب گئے: 14 افراد ریسکیو

 بہاولپور/ بہاولنگر (آئی این پی) دریائے ستلج کے سیلابی ریلے سے جلالپور کا حفاظتی بند ٹوٹ گیا جس سے سینکڑوں ایکڑ رقبہ زیر آب آ گیا۔ ریسکیو حکام کے مطابق دریائے ستلج کے سیلابی ریلے میں پھنسے افراد کو 14  کشتیوں کے ذریعے منتقل کیا گیا۔ سیلابی ریلے نے احمد پور شرقیہ کے دریائی بیلٹ میں تباہی مچا دی جس سے ہزاروں ایکڑ زرعی اراضی پر کھڑی فصلیں تباہ ہوگئیں۔ جب کہ بہاولنگر میں درجنوں آبادیاں پانی کی لپیٹ میں آگئیں۔ دوسری جانب ترجمان پی ڈی ایم اے کا کہنا ہے کہ دریائے ستلج میں سیلابی صورتحال برقرار ہے، گنڈا سنگھ، سلیمانکی اور ہیڈ اسلام کے مقام پر درمیانے درجے کا سیلاب ہے جہاں گنڈا سنگھ کے مقام پر پانی کا بہائو ایک لاکھ 8 ہزار کیوسک ہے۔ ترجمان کے مطابق ہیڈ سلیمانکی کے مقام پر پانی کی آمد 98 ہزار 878  اور اخراج 85 ہزار 14 کیوسک ہے جبکہ ہیڈ اسلام کے مقام پر پانی کا بہائو82 ہزار 916 کیوسک ہے۔ ترجمان نے بتایا کہ میلسی سائفن کے مقام پر بھی درمیانے درجے کا سیلاب ہے جبکہ پنجاب کے دیگر دریائوں میں پانی کا بہاو نارمل ہے۔ ترجمان پی ڈی ایم کے مطابق مون سون بارشیں 4 ستمبر تک جاری رہنے کے امکانات ہیں اور تمام بڑے دریائوں کے بالائی علاقوں میں موسلا دھار بارشیں متوقع ہیں۔