چترال (نوائے وقت رپورٹ) دریائے چترال پر چلنے والی چیئر لفٹ رسی ٹوٹنے کے سبب پھنس گئی۔ ڈیزاسٹر ٹیم نے 45 منٹ کی جدوجہد کے بعد پھنسے ہوئے تین افراد کو بچا لیا۔ اپر چترال میں دریائے چترال پر کوراغ کے مقام پر چلنے والی چیئر لفٹ کے پھنسنے کا واقعہ پیش آیا ہے جس میں رسی ٹوٹنے کے سبب تین افراد پھنس گئے۔ امدادی ادارے کے ترجمان بلال احمد فیضی کے مطابق چئیر لفٹ میں 3 افراد کے پھنسنے کی اطلاع پر ریسکیو 1122 کی ڈیزاسٹر ٹیم موقع پر پہنچ گئی اور ٹیم نے پیشہ ورانہ طریقے سے امدادی سرگرمیاں شروع کیں۔ ریسکیو 1122 کا اہلکار ٹوٹی ہوئی رسی پر رِنگ کی مدد سے ریپلنگ کرتے ہوئے ڈولی تک پہنچ گیا۔ ترجمان کے مطابق ڈیزاسٹر اہلکار نے ڈولی کو صحیح کرتے ہوئے رسی سے باندھ دیا۔ ریسکیو اہلکار واپس ریپلنگ کرتے ہوئے کنارے پر پہنچا اور ڈولی کو کھینچ کر کنارے پر منتقل کردیا۔