ریڈیو آج بھی عوام تک تفریح کیساتھ صورتحال پہنچانے کا موثر ذریعہ ہے:شہنشاہ فیصل عظیم 

لاہور(نیوز رپورٹر) ڈائریکٹر جنرل تعلقات عامہ پنجاب ڈاکٹر شہنشاہ فیصل عظیم نے کہا ریڈیو آج بھی عوام تک صحت مند تفریح کیساتھ ساتھ لمحہ بہ لمحہ کی صورتحال پہنچانے کا موثر ذریعہ ہے۔دشمن کیخلاف جنگ ہو یا نظریہ پاکستان اور وطن سے محبت، ریڈیو پاکستان نے ہمیشہ شاندار کردار اداکیا ہے۔ ڈی جی پی آر پنجاب نے گزشتہ روز ریڈیو پاکستان لاہور آفس کا دورہ کیا۔ ایڈیشنل ڈی جی پی آر عابد نور بھٹی،ڈائریکٹر الیکٹرانک میڈیا احمد نعیم ملک اور ڈائریکٹر ہیڈکوارٹرمحمد سہیل رانا بھی ان کے ہمراہ تھے۔ریڈیو پاکستان لاہور کے سٹیشن ڈائریکٹر ڈاکٹر احمر سہیل بسراء اور کنٹرولر نیوز سجاد پرویز نے ڈی جی پی آر اور ان کی ٹیم کا استقبال کیا۔ ڈی جی پی آر پنجاب ڈاکٹر شہنشاہ فیصل عظیم نے کہا ریڈیو پاکستان، پی ٹی وی اور ڈی جی پی آر تینوں سرکاری ادارے ملکر حکومتی کارکردگی کو احسن طریقے سے عوام تک پہنچا رہے ہیں۔ ہمارا آپس میں مضبوط رابطہ ہماری پیشہ وارانہ صلاحیتوں میں مزید اضافہ کا باعث بنے گا۔