این اے 79 گوجرانوالہ، ووٹوں کی دوبارہ گنتی ‘ لیگی امیدوار ذوالفقار بھنڈر کامیاب 

گوجرانوالہ؍ لاہور (نوائے وقت رپورٹ) گوجرانوالہ میں قومی اسمبلی کے حلقہ این اے 79 پر ووٹوں کی دوبارہ گنتی میں مسلم لیگ (ن) کے امیدوار ذوالفقار بھنڈر کامیاب ہو گئے۔ آر او شبیر حسین بٹ کے مطابق ذوالفقار بھنڈر نے 95609 ووٹ حاصل کئے جبکہ پی ٹی آئی کے احسان اللہ ورک نے 92581 ووٹ لئے۔ عام انتخابات میں پی ٹی آئی حمایت یافتہ احسان اللہ ورک کامیاب ہوئے تھے اور ذوالفقار بھنڈر 4388 ووٹوں سے ہار گئے تھے۔ دوبارہ گنتی میں 23 ہزار 845 ووٹ مسترد ہوئے۔ 2024ء کے عام انتخابات میں مسلم لیگ (ن) کے امیدوار ذوالفقار بھنڈر کو 4 ہزار 388 ووٹ سے شکست ہوئی تھی۔ سیٹ پر جیتنے پر مسلم لیگی امیدوار کے حامیوں نے جشن منایا۔ قبل ازیں لاہور ہائیکورٹ کے جسٹس چودھری محمد اقبال نے این اے 79 گوجرانوالہ سے کامیاب پی ٹی آئی ایم این اے احسان اللہ ورک کی ووٹوں کی دوبارہ گنتی کے خلاف درخواست کے قابل سماعت ہونے پر فیصلہ محفوظ کر لیا۔