ارشد ندیم کو ہلال امتیاز سے نواز دیا، صدر کا اپنی جانب سے 10 کروڑ روپے انعام کا اعلان

اسلام آباد (نوائے وقت رپورٹ+نمائندہ خصوصی) صدر مملکت آصف زرداری نے پیرس اولمپکس میں قوم کا سر فخر سے بلند کرنے والے اولمپین گولڈ میڈلسٹ ارشد ندیم کو ہلال امتیاز عطا کر دیا۔ ایوان صدر اسلام آباد میں ارشد ندیم کو ہلال امتیاز دینے کی خصوصی تقریب کا انعقاد کیا گیا۔ ہلال امتیاز سے نوازنے کے بعد صدر مملکت سے چیمپئن ایتھلیٹ نے ملاقات کی۔ اس موقع پر صدر مملکت نے ارشد ندیم کی شاندار کامیابی، مسلسل محنت اور لگن کو سراہا۔ اس دوران صدر مملکت نے ارشد ندیم کیلئے اپنی جانب سے 10 کروڑ روپے انعام کا اعلان کیا اور کہا کہ ارشد ندیم نے ملک کے لاتعداد نوجوان کھلاڑیوں کو بھی متاثر کیا۔ صدر مملکت کا کہنا تھا کہ وہ کھلاڑیوں کی فلاح و بہبود کیلئے سندھ حکومت کو پاکستان سپورٹس بورڈ کے انڈومنٹ فنڈ میں 250 ملین روپے کا حصہ ڈالنے کا کہیں گے۔ صدر زرداری نے ارشد ندیم کو ہلالِ امتیاز سے نواز دیا۔ آصف علی زرداری نے کہا کہ ارشد ندیم نے اولمپک ریکارڈ بنا کر ملک کا سرفخر سے بلند کیا، پاکستان کو دیگر کھیلوں خصوصاً سنگلز کو فروغ دینے کی ضرورت ہے۔ انکا کہنا تھا کہ کھلاڑیوں کے بچوں کو سکالر شپ دی جانی چاہیے، سندھ حکومت کو پی ایس بی انڈومنٹ فنڈ میں 250 ملین روپے کا حصہ ڈالنے کا کہوں گا۔