کیویز کے حملوں سے شاہین سنبھل نہ سکے۔ 373 رنز کے ہدف کا تعاقب کرتے ہوئے قومی بلے بازوں نے 8 وکٹ کے نقصان پر 259 رنز بنا لیے۔
پہلے ٹیسٹ کے آخری روز کا کھیل جاری ہے۔ اظہر علی نے 34 اور فواد عالم نے 21 رنز سے پانچویں روز کھیل کا آغاز کیا۔ اظہر علی زیادہ دیر تک وکٹ پر نہ ٹھہر سکے اور 48 رنز پر چلتے بنے۔ کپتان محمد رضوان 60 سکور پر جیمیسن کی بال پر ایل بی ڈبلیو ہوئے، فواد عالم نے سنچری بنائی تاہم 102 رنز پر ہی ویٹلنگ کو کیچ پکڑا بیٹھے اور پویلین لوٹ گئے۔ یاسر شاہ صفر جبکہ فہیم اشرف 19 رنز پر ہمت ہار گئے، یوں 259 رنز پر پاکستان کی 8 وکٹیں گر گئیں۔ محمد عباس اور شاہین آفریدی کریز پر موجود ہیں۔
گزشتہ روز 373 رنز کے ہدف کا تعاقب کرنے کیلئے قومی بلے باز اِن ایکشن ہوئے، دونوں اوپنر شان مسعود اور عابد علی کھاتہ کھولے بغیر پویلین لوٹ گئے، حارث سہیل 9 رنز بنا کر نو دو گیارہ ہوئے، دن کے اختتام پر قومی ٹیم نے تین وکٹ پر 71 رنز بنا لیے، اس سے قبل کیویز نے دوسری اننگز میں 5 وکٹوں کے نقصان پر 180 رنز کا اضافہ کیا اور اننگز ڈکلیئر کر دی۔
ماؤنٹ منگنوئی ٹیسٹ کے تیسرے روز قومی ٹیم 239 رنز بنا کر آؤٹ ہو گئی تھی اور میزبان ٹیم کو پہلی اننگز میں ہی 192 رنز کی برتری حاصل ہو گئی تھی۔ پہلے ٹیسٹ کے تیسرے روز 30 رنز اور ایک وکٹ کے نقصان پر پاکستان نے بیٹنگ کا آغاز کیا تو شاہینوں کی وکٹیں یکے بعد دیگرے گرنے لگیں، اس دوران بارش کے باعث کھیل بار بار متاثر ہوا۔ عابد علی نے کریز پر قدم جمانے کی کوشش کی تاہم صرف 25 رنز دے سکے، انہیں جیمیسن نے شکار کیا، ان کے بعد محمد عباس 5 ، اظہر علی بھی 5، حارث سہیل 3 اور فواد اسلم 9 رنز پر کیویز فیلڈرز کو کیچ پکڑاتے اور پویلین واپس لوٹتے رہے۔
کپتان محمد رضوان نے ذمہ دارانہ بیٹنگ کا مظاہرہ کیا، فہیم اشرف کی شراکت داری میں کیویز کیخلاف مزاحمت دکھائی اور نصف سنچری مکمل کرتے ہوئے 71 رنز بنائے۔ فہیم نے بھی ہمت کی اور 91 سکور کئے تاہم یاسر شاہ اور شاہین آفریدی نے بھی دیگر بلے بازوں کی طرح خراب کارکردگی کا مظاہرہ کیا، بالترتیب 4 اور 6 رنز بنا کر پویلین لوٹ گئے۔ یوں پوری ٹیم 239 کے مجموعی سکور پر آوٹ ہو گئی۔
گزشتہ روز میزبان ٹیم کے 431 رنز کے جواب میں پاکستانی اوپنرز شان مسعود اور عابد علی نے اننگز کا آغاز کیا تھا، شان نے کارکردگی دکھائے بنا جلد ہی واپسی اختیار کی اور صرف 10 رنز بنائے تھے۔ بولر یاسر شاہ کا کہنا تھا کہ نیوزی لینڈ کے بیٹسمین نے وکٹ پر ٹھہر کر اسکور کیا، ہمارے بلے بازوں کو بھی وکٹ پر ٹھہرنا ہو گا، کرکٹ میں کیچ ڈراپ بھی ہوتے ہیں۔
اس سے قبل کیویز نے ماؤنٹ مونگا نوئی ٹیسٹ کے دوسرے روز کھیل کے آغاز پر 222 رنز اور 3 وکٹوں کے نقصان سے اننگز کا تسلسل جوڑا تو 209 رنز اضافے کے دوران باقی 7 بھی وکٹیں گنوا لیں۔ ولیمسن 129، بی جے والٹنگ 73، روز ٹیلر 70 اور ہینری نکلولز 56 رنز کے ساتھ نمایاں رہے۔
شاہین آفریدی نے 109 رنز کے عوض 4 وکٹیں حاصل کیں جبکہ یاسر شاہ نے 113 رنز کے عوض 3 کیویز بلے بازوں کو پویلین کی راہ دکھائی جبکہ نسیم شاہ، محمد عباس اور فہیم اشرف نے ایک ایک کھلاڑی کو آؤٹ کیا۔