ایف پی سی سی آئی کے سالانہ انتخابات آج فیڈریشن ہائوس کراچی میں ہونگے

کراچی(کامرس رپورٹر) وفاق ایوانہائے صنعت وتجارت(ایف پی سی سی آئی)میں ہونے والے سالانہ انتخابات برائے2024-2025میں آج فیڈریشن ہائوس کراچی میں ہونگے۔انتخابات میں برسر اقتدار بزنس مین پینل اوریونائٹیڈ بزنس گروپ (یو بی جی) کے امیدواروں کے مابین مقابلہ ہوگا۔فیڈریشن کے سیکریٹری جنرل ایف پی سی سی آئی کے حتمی ووٹرز کی لسٹ میڈیا کو فراہم کرنے میں ناکام رہے تاہم تقریباً 400ووٹرز حق رائے دہی کا استعمال کرینگے۔ برسراقتدار گروپ کے صدارتی امیدوار محمدعلی شیخ کا مقابلہ یو بی جی کے صدارتی امیدوار عاطف اکرام شیخ کرینگے جبکہ سینئرنائب صدر کے عہدے کیلئے بی ایم پی کے حاجی غنی عثمان اوریو بی جی کے ثاقب فیاض مگوں میں مقابلہ ہے۔چیمبر کلاس میں نائب صدر کی 5نشستوں پریو بی جی کے امیدوارعبدالمومن خان،جبار امین موتی والا،اکبرخان،زین افتخار اوراشفاق احمد بزنس مین پینل کے امیدواروں یاسین میمن،حافظ آصف اقبال،ناصر خان،عون علی سید سے مقابلہ کریں گے۔اس طرح صدر،سینئرنائب صدر اور 11نائب صدور کے انتخاب کیلئے آج ہفتے کو صبح ساڑھے9بجے سے شام ساڑھے5بجے تک پولنگ ہوگی۔ ناخوشگوار واقعہ سے نمٹنے کیلئے ہفتے کو رینجرز اور پولیس کی مدد طلب کی گئی ہے ۔