لاہور (کامرس رپورٹر)پاکستان فٹ ویئر مینوفیکچررز ایسوسی ایشن (پی ایف ایم اے) اور پاکستان ٹینرز ایسوسی ایشن (پی ٹی اے) کے زیر اہتمام ایکسپو سینٹر لاہور میں تین روزہ پاکستان میگا لیدر شو 2019ء (پی ایم ایل ایس 2019ئ) کا گزشتہ روز اختتام ہوگیا ۔ میگا لیدر شو میں 300 سے زائد سٹالز لگائے گئے۔ میگا شو میں لیدر انڈسٹری، کاروباری برادری، متعلقہ اداروں سمیت 15 ہزار سے زائد افراد نے شرکت کی۔ پی ایم ایل ایس 2019ء لیدر مصنوعات بشمول جوتا سازی، ملبوسات، دستانے، لیدر سے متعلقہ اشیاء اور لیدر پروسیسنگ مشینری اور کیمیکلز کے فروغ کیلئے ایک سالانہ نمائش ہے۔ نمائش کنندگان نے اپنے سٹالز پر وسیع اقسام کی حامل مصنوعات کی نمائش کی۔ نمائش میں ان پٹ سپلائرز، چمڑے کی مصنوعات تیار کرنے والوں، خریداروں اور لیدر کے شعبہ میں ممکنہ شراکت داروں نے اقتصادی نمو اور ترقی کی حوصلہ افزائی کے نکتہ نظر کے ساتھ شرکت کی۔