پی ایس ایل فور‘ برائیٹو پینٹس بھی مرکزی سپانسرز میں شامل

لاہور(سپورٹس رپورٹر+نمائندہ سپورٹس)ایچ بی ایل پاکستان سپر لیگ کے چوتھے ایڈیشن کیلئے برائیٹو پینٹس بھی مرکزی سپانسرز میں شامل ہو گیا۔ اس سلسلہ میں خصوصی تقریب ہوئی جس میں پی ایس ایل ہیڈ آف مارکیٹنگ صہیب شیخ اور برائیٹوپینٹس کے ڈائریکٹر سیلز اینڈ مارکیٹنگ عاطف ریاض سکہ نے مفاہمتی یاداشت پر دستخط کیے۔ صہیب شیخ کا کہنا تھا کہ خوشی ہے کہ برائیٹوپینٹس ایک مرتبہ پھر پاکستان سپر لیگ کے چوتھے ایڈیشن کے لیے بھی ہمارے ساتھ شانہ بشانہ چل رہا ہے جس پر برائیٹ پینٹس کی انتظامیہ مبارکباد کی مستحق ہے۔ پاکستان سپر لیگ کا شمار دنیا کے بہترین برانڈز میں ہونا شروع ہو گیا ہے۔ سپانسرز کے لیے بھی اپنی مصنوعات کی تشہیر کا بہترین موقع ہے۔ڈائریکٹر سیلز اینڈ مارکیٹنگ برائیٹو پینٹس عاطف ریاض سکہ کا کہنا تھا کہ خوشی ہے کہ مسلسل چوتھے سال بھی پاکستان سپر لیگ کو سپانسر کر رہے ہیں۔ ہماری نیک تمنائیں پاکستان کرکٹ بورڈ اور پی ایس ایل مینجمنٹ کے ساتھ ہیں کہ چوتھا ایڈیشن بھی کامیاب رہے۔ عاطف ریاض سکہ کا کہنا تھا کہ ایڈیشن کے لیے سلوگن دیا ہے جس میں کہا گیا ہے کہ ’’کرکٹ کے رنگ برائیٹو کے سنگ‘‘۔ ٹرانس میڈیا کے راو ہاشم عثمان خان نے تقریب میں شریک افراد کا شکریہ ادا کیا۔