بھارت کا پاکستان میں ایشیا کپ کھیلنے سے انکار

لاہور(سپورٹس رپورٹر+نمائندہ سپورٹس) بھارت نے پاکستان میں ایشیا کپ کھیلنے سے انکار کر دیا، پاکستان کا بھی کرارا جواب، بھارت نہ آیا تو ہم بھی بھارت نہیں جائیں گے۔ پی سی بی کا دوٹوک اعلان،بھارتی ہٹ دھرمی برقرار، کھیل میں سیاست سے باز نہ آیا، بھارتی میڈیا نے دعوی کیا ہے کہ انڈین بورڈ نے پاکستان میں ایشیا کپ کھیلنے سے انکار کر دیا، بھارتی بورڈحکام نے پاکستان میں ایشیا کپ کھیلنے سے انکار کرتے ہوئے موقف اختیارکیا کہ بھارت کسی صورت اپنے میچز پاکستان میں نہیں کھیلے گا۔ بھارتی بورڈ نیوٹرل مقام پر میچز کھیلنے کو تیار ہے۔ ایشین کرکٹ کونسل چاہے بھارت کے بغیر ایشیا کپ کروا سکتی ہے۔ دوسری جانب اس ساری صورتحال پر پی سی بی نے دوٹوک موقف اختیارکرتے ہوئے کہا کہ بھارت کے حوالے سے فیصلہ کیاہے کہ اس معاملے پر ایشین کرکٹ کونسل میں بات ہوگی اور کونسل کے فیصلے کو تسلیم کیا جائے گا۔ بھارت کے ایشیا کپ میں پاکستان سے کھیلنے سے انکار کے بعد ایشین کرکٹ کونسل کا اجلاس اہمیت اختیار کرگیا ہے، اجلاس میں ایشیا کپ میں اہم فیصلے ہوں گے۔ ذرائع کے مطابق ایشین کرکٹ کونسل کے اجلاس میں پورا ایشیا کپ نیوٹرل وینیو یا پھر بھارت کے میچ کسی دوسرے وینیو او ر باقی میچز پاکستان میں کروانے پر غور کیا جائے گا۔