جیت ٹیم ورک کا نتیجہ غلطیوں سے سیکھنا ضروری بابر اعظم پاکستان اچھا کھیلا کوئنٹن ڈی کوک

لاہور (نمائندہ سپورٹس +سپورٹس رپورٹر)پاکستان کرکٹ ٹیم کے کپتان بابر اعظم نے کہا ہے کہ پہلی اننگز میں 4 آوٹ ہونے کے بعد فواد عالم اور اظہر علی نے شاندار کھیل پیش کیا، فواد عالم کی اننگز سے ٹیم کو اعتماد ملا کہ ہم یہ میچ جیت سکتے ہیں۔کراچی میں ٹیسٹ میچ میں جنوبی افریقہ کی کرکٹ ٹیم کو شکست دینے کے بعد پر یس کانفرنس کرتے ہوئے بابر اعظم نے کہا کہ فہیم اشرف کو کریڈیٹ دوں گا کہ اس نے بطور ٹیسٹ پلیئر خود کو بہتر کیا ہے۔میرا بطور کپتان یہی ہدف ہے کہ ہوم کنڈیشنز کے علاوہ باہر جاکر بھی جیتیں، ہم باہر جاکر اچھا کھیلیں گے تو ہمارے اعتماد میں اور اضافہ ہوگا۔ پلیئرز کو یہی بتایا جاتا ہے کہ خود پر اعتماد رکھیں، غلطی ہر کوئی کرتا ہے، غلطیوں سے سبق سیکھنا ضروری ہے۔انہوں نے کہا کہ بطور کر کٹ ٹیم ایک بڑی ٹیم کیخلاف جیت بہت ضروری تھی، پاکستان کی پوری ٹیم میں ہر کسی نے جیت میں حصہ ڈالا۔ یہاں کی کنڈیشنز اور پنڈی کی کنڈیشنز مختلف ہیں، ٹیم کے بارے میں وہاں جاکر ہی سوچیں گے، ایک دو سیریز پر پلیئرز کو جج نہ کریں، پورا پورا چانس دیں۔ وہ پلان کے مطابق کھیلے اور کامیاب رہے ، جیتنے پر اللہ کا شکر اداکرتے ہیں۔ نعمان علی، یاسر شاہ، فواد عالم، اظہر علی سب نے ہی اچھا کھیلا ہے۔بابر اعظم کاکہنا تھا کہ کسی بھی میچ کوجیتنے کیلئے پارٹنر شپ ضروری ہے۔جنوبی افریقہ کی ٹیم کے کپتان کوئنٹن ڈی کوک نے میچ کے بعد گفتگو کرتے ہوئے کہاہے کہ اس وکٹ پر ہمارا 220 رنز کا پہلی اننگز میں سکور کافی کم تھا، ہم نے پہلی اننگز میں غلطیاں کیں تاہم دوسری اننگز میں بہتر کھیلے ہیں۔کراچی ٹیسٹ میں شکست کے بعد پریس کانفرنس کرتے ہوئے کوئنٹن ڈی کوک نے کہا کہ بائولرز نے پوری جان لگائی، کہیں غلطی نہیں کی، مگر پاکستان نے اچھی ٹیسٹ کرکٹ کھیلی اور بہترین بیٹنگ کا مظاہرہ کیا۔ ابھی تو پہلا میچ ختم ہوا ہے، اگلے میچ میں کیا کرنا اس بارے میں سوچا نہیں۔ کسی بھی ٹیم کیلئے اوے کنڈیشنز میں کھیلنا مشکل ہوتا ہے۔ پاکستان نے جنوبی افریقہ کے مقابلے میں سپنرر کو زیادہ بہتر انداز میں کھیلا ہے۔