بھوبنیشور(این این آئی ) بھارتی ریاست اوڈیشا کے وزیر صحت کو ایک پولیس اہلکار نے نامعلوم وجوہات کی بنا پر براہ راست سینے میں دو گولیاں مار دیں اور موقع سے فرار ہوگیا۔وزیر صحت پر فائرنگ کرنے والے اسسٹنٹ سب انسپکٹر کی شناخت گوپال داس کے نام سے ہوئی ہے۔ تاحال واقعے کے محرکات کا تعین نہیں ہوسکا۔ تفتیشی عمل جاری ہے۔بھارتی میڈیا کے مطابق اتوار کوریاست اڈیشا کے وزیر صحت نابا کشور داس کو گاندھی چوک کے نزدیک اسسٹنٹ سب انسپکٹر (اے ایس آئی)نے اس وقت گولی ماری جب وہ ایک تقریب میں شرکت کے لیے پہنچے تھے۔عینی شاہدین کا کہنا تھا کہ وزیر صحت جیسے ہی اپنی کار سے اترے انکی سیکیورٹی پر مامور پولیس اہلکار نے سرکاری پستول سے یکے بعد دیگرے دو گولیاں ان کے سینے میں اتار دیں،وزیر صحت کو انتہائی تشویش ناک حالت میں قریبی اسپتال منتقل کیا گیا جہاں طبیعت نہ سنبھلنے پر طیارے کے ذریعے ریاستی دارلحکومت بھونیشور لے جایا گیا جہاں ماہر ڈاکٹر کی زیر نگرانی پیچیدہ آپریشن کیا جا رہا ہے۔پولیس ترجمان کا کہنا تھا کہ وزیر صحت پر فائرنگ کرنے والے اسسٹنٹ سب انسپکٹر کی شناخت گوپال داس کے نام سے ہوئی ہے۔ تاحال واقعے کے محرکات کا تعین نہیں ہوسکا۔ تفتیشی عمل جاری ہے۔