پاکستان پیپلز پارٹی کے چیئرمین اور سابق وزیر خارجہ بلاول بھٹو نے کہا کہ عمران خان مان لیں جو وہ کرتے آرہے تھے وہ غلط تھا، ایسا نہ ہو کہ وہی خان صاحب جیل سے باہر نکلیں۔ان خیالات کا اظہار انہوں نے یوٹیوب پر ڈیجیٹل چینل کو انٹرویو دیتے ہوئے کیا۔ انہوں نے کہا کہ ‘میں نے سیاست کے ذریعے ہی ٹوٹی پھوٹی اردو سیکھی۔ میرے خیال میں دونوں ایک دوسرے سے کافی جڑے ہوئے ہیں۔’انٹرویو کے دوران میزبان نے سوال کیا کہ کیا کہ آپکو کبھی محبت ہوئی؟ جس پر بلاول بھٹو نے کہا کہ ‘ابھی تک نہیں ہوئی، ابھی ہونا ہے۔ نیٹفلکس سے متعلق سوال پر انہوں نے کہا کہ آج کل الیکشن مہم کی وجہ سے کچھ نہیں دیکھ رہا۔ آخری فلم ‘دی کراؤن’ دیکھی تھی۔
شادی سے متعلق سوال پر بلاول نے کہا کہ ‘الیکشن سے پہلے تو یہ ممکن نہیں۔ میں جب اپنے بھانجوں کو دیکھتا ہوں تو دل واقعی خوش ہوجاتا ہے۔’بانی پی ٹی آئی عمران خان سے متعلق سوال پر ان کا کہنا تھا کہ انہیں مشورہ دونگا کہ پرانی سیاست چھوڑ دیں، آئیں جمہوری سیاست کریں۔ مان لیں کہ آپ غلط تھے، جو آپ کرتے آرہے تھے وہ غلط تھا۔بلاول بھٹو نے مزید کہا کہ ‘عمران خان اُن لوگوں سے معافی مانگیں جنہیں انہوں نے چور کہا اور زندہ لاشیں کہا۔ مجھے امید ہے کہ عمران خان جو وقت جیل میں گزار رہے ہیں، اس سے ان میں بہتری آئے، ایسا نہ ہو کہ وہی خان صاحب جیل سے باہر نکلیں۔
