32ویں نیشنل گیمز میں میڈلز جیتنے والے کھلاڑیوں کے اعزاز میں خصوصی تقریب

لاہور (سپورٹس رپورٹر) پاکستان اولمپک ایسوسی ایشن کے زیراہتمام دسمبر 2012ءمیں ہونے والی 32 ویں نیشنل گیمز میں پنجاب کے میڈل جیتنے والے کھلاڑیوں کے اعزاز میں خصوصی تقریب گذشتہ روز پنجاب اولمپک ایسوسی ایشن کے صدر سید شاہد علی کی جانب سے منعقد کی گئی۔ اس موقع پر نیشنل گیمز میں میڈل حاصل کرنے والے پنجاب کے کھلاڑی نقد انعامات تقسیم کیے گئے۔ اس موقع پر پنجاب اولمپک ایسوسی ایشن کے صدر سید شاہد علی نے کہا کہ چونکہ پنجاب میزبان تھا جس نے 32 ویں نیشنل گیمز کا شاندار انعقاد کرایا۔ بعض مصروفیات کی بنا پر کھلاڑیوں کے اعزاز میں تقریب نہیں کی جا سکی تھی۔ انہوں نے کہا کہ پنجاب کے کھلاڑیوں پر مجھے فخر ہے کہ انہوں نے نامساعد حالات میں بھی نیشنل گیمز میں نہ صرف شرکت کی بلکہ میڈل بھی اپنے نام کئے۔ انہوں نے تمام کھلاڑیوں کو میڈل جیتنے پر مبارکباد دی اور توقع ظاہر کی کہ مستقبل میں بھی پنجاب کے کھلاڑی نیشنل گیمز میں اچھی کارکردگی دکھائیں گے۔