کراچی (نوائے وقت رپورٹ) آل پاکستان ٹیکسٹائل ملز ایسوسی ایشن اپٹما نے حکومت سے انڈیپینڈنٹ پاور پروڈیوسرز (آئی پی پیز) کے ساتھ معاہدوں کی تفصیلات مانگل لی ہیں۔ اپٹما کے چیئرمین نے سینٹرل پاور پرچیزنگ ایجنسی اور سکیورٹی ایکس چینج کمشن آف پاکستان (ایس ای سی پی) سیکرٹری پاور مینجنگ ڈائریکٹر ایم ڈی پرائیویٹ پاور انفراسٹرکچر بورڈ کو بھیجے گئے خط میں کہا ہے کہ آئی پی پیز کے ساتھ واجبات کی سیٹملنٹ کے معاہدوں کی معلومات دی جائیں۔ اپٹما کی جانب سے جاری خط میں کہا گیا ہے کہ مقامی یا عالمی سطح پر آئی پی پیز کے ساتھ ثالثی سے متعلق معلومات بھی فراہم کی جائیں۔ آئی پی پیز کے ساتھ معاہدوں کے خاتمے کے حوالے سے کیا کوئی اقدامات اٹھائے گئے۔ خط میں کہا گیا کہ آئی پی پیز سے متعلق معلومات ریسرچ اور تجزیے کیلئے مانگی ہے۔ قانون کے تحت 10 روز میں آئی پی پیز کا مکمل ریکارڈ فراہم کیا جائے۔ آئی پی پیز کی تفصیلی فنانشل سٹیٹمنٹ فراہم کی جائے۔ خط  کے متن میں مزید کہا گیا ہے کہ آئی پی پیز کی آمدن، منافع اور آڈٹ رپورٹس فراہم کی جائیں۔ آئی پی پیز کے پاور پرچیز ایگریمنٹس فراہم کئے جائیں۔ معاہدوں میں ترامیم، تجدید اور مالی فائدوں کی تفصیلات فراہم کی جائیں اور معاہدوں کی توسیع اور تنسیخ کا ریکارڈ بھی فراہم کیا جائے۔ اپٹما کا کہنا ہے کہ آئی پی پیز کے زیر التواء  مقامی اور غیر ملکی کیسز کا ریکارڈ فراہم کیا جائے۔ آئی پی پیز کے بلٹ آپریٹ ٹرانسفر، بلٹ اونڈ آپریٹ ٹرانسفر منصوبوں کا ریکارڈ فراہم کیا جائے۔