قومی انڈر16 ویمنز فٹبال چیپئن شپ، ماڈل ٹائون اکیڈمی سیمی فائنل میں

لاہور(اسپورٹس رپورٹر) شلائیلہ بلوچ قومی انڈر16 ویمنز فٹبال چیپئن شپ کے کوارٹر فائنل میں ماڈل ٹائون اکیڈمی ٹیم نے پنجاب کو 18-0 سے شکست دے دی، عالیہ صادق نے ڈبل ہیٹ ٹرک سمیت 9گول کئے۔ دیا کلب نے سندھ کو 6-0 سے شکست دیکر سیمی فائنل میں جگہ بنالی۔ سٹی سکول گلبرگ کے گرائونڈ پر کھیلے جانے والے ناک آوٹ میچ میں ماڈل ٹائون فٹبال اکیڈمی ٹیم نے پنجاب کیخلاف جارحانہ آغاز کرتے ہوئے پے درپے گول داغ دیئے، عالیہ صادق نے پہلی کامیاب کوشش کے بعد اگلے 23منٹ میں مزید 3 بار بال کو جال میں پھینک دیا، پہلا ہاف ختم ہونے سے قبل نبیہا اسد نے گول کرتے ہوئے سکور5-0 کر دیا۔ وقفے کے بعد پنجاب کا دفاع مزید کمزور پڑگیا، سماویہ نے 2، انوشے اور عالیہ صادق نے ایک ایک گول کیا،نبیہا اور انوشے نے سکور 11-0کردیا، عالیہ صادق نے 55ویں سے 62ویں منٹ کے دوران مسلسل 4گول داغ کر دوسری ہیٹ ٹرک بھی مکمل کرلی،آخری لمحات میں انوشے، نور قیصر اور سماویہ نے حریف کے دفاع میں شگاف کرتے ہوئے سکور18-0 کردیا۔دوسرے کوارٹر فائنل میں دیا کلب نے سندھ کیخلاف 12ویں منٹ میں برتری حاصل کرلی،گول زنیریا شاہ نے کیا،امیرہ حق نے مسلسل 2بار بال کو جال میں پھینکا،سحرش واحد نے سکور 4-0کیا،دوسرے ہاف میں امیرہ حق نے 47ویں اور شمائلہ حسن نے 60ویں منٹ میں گول کرتے ہوئے سندھ کی شکست پر مہر لگادی۔