اسلام آباد ( سپورٹس رپورٹر) پاکستان کرکٹ بورڈ (پی سی بی) کے زیر اہتمام ریجنل اکیڈمیز پروگرام کے تحت راولپنڈی ریجن انڈر 19 کا تربیتی کیمپ کے آر ایل گرائونڈ، راولپنڈی میں جاری ہے۔ ریجنل کرکٹ ایسوسی ایشن (آر سی اے) راولپنڈی کے صدر سید نعیم اختر گیلانی کے مطابق پی سی بی ریجنل اکیڈیمز پروگرام کے سلسلے میں راولپنڈی ریجن انڈر 19 ٹیم کا تربیتی کیمپ ریجنل ہیڈ کوچ صبیح اظہر کی زیر نگرانی کے آر ایل گرائونڈ، راولپنڈی میں جاری ہے، دیگر کوچنگ سٹاف میں اسسٹنٹ کوچ بلال احمد، ٹرینر ابرار حسین اور فزیو ڈاکٹر ریحان خالد شامل ہیں۔ انہوں نے بتایا کہ کوچنگ پروگرام کے دوران نوجوان کھلاڑیوں کی فزیکل فٹنس، ٹیکنیکل، ٹیکٹیکل اور ذہنی پختگی پر توجہ دی جا رہی ہے تاکہ ڈومیسٹک سیزن میں کھلاڑیوں کی کارکردگی میں نمایاں نکھار پیدا ہو سکے۔ ان کا کہنا تھا کہ نوجوان کھلاڑیوں کو لیکچرز کے ذریعے بھی کھیل سے متعلق آگاہی فراہم کر رہے ہیں۔