پنجاب کی ہینڈی کرافٹس دنیا بھر میں مشہور ہیں:احمد جاوید قاضی 

لاہور(کامرس رپورٹر )پنجاب کے سیکرٹری صنعت وتجارت احمد جاوید قاضی نے کہا ہے کہ پنجاب کی ہینڈی کرافٹس دنیا بھر میں مشہور ہیں اور حکومت دستکاروں کے اس فن کی ترویج کیلئے ہر ممکن معاونت فراہم کررہی ہے۔ انہوں نے اس امر کا اظہار دستکاروں کی معاونت اور ان کے فن کی ترویج کیلئے جاری سکیموں پر پیشرفت کا جائزہ لینے کیلئے منعقد ہونے والے اجلاس کی صدارت کرتے ہوئے کیا ہے۔ انہوں نے کہا کہ دستکاری کے فن کی ترویج اور دستکاروں کی معاونت کیلئے حکومت نے موثر اقدامات کیے ہیں۔ اس مقصد کے لئے جاری ترقیاتی منصوبوں کو بہتر انداز سے آگے بڑھانے سے معیشت پر مثبت اثرات مرتب ہونگے اوریہ منصوبے لوگوں کیلئے خوشحالی لائیں گے۔ سیکرٹری صنعت وتجارت نے ہدایت کی کہ پنجاب سمال انڈسٹریز کارپوریشن کی سکیموں پر کام کی رفتارمزید تیز کی جائے اور ترقیاتی سکیموں میں معیار کو ہر قیمت پر یقینی بنایا جائے۔