ہملٹن (سپورٹس ڈیسک)ہملٹن ٹیسٹ کا پانچواں روز بارش کی نذر ہوجانے کے سبب جنوبی افریقی ٹیم یقینی شکست سے بچ گئی جس کے سبب وہ تین ٹیسٹ میچوں کی سیریز بھی1-0 سے اپنے نام کرنے میں کامیاب ہوگئی۔ پہلی اننگزمیں 314رنزبنانے والی جنوبی افریقی ٹیم اپنی دوسری اننگز میں 80 رنز پر پانچ وکٹیں گنواچکی تھی ،اس کے باوجود وہ مزید95رنزکے خسارے سے دوچار تھی۔ اگر پانچویں دن کا کھیل ممکن ہوجاتا تو عین ممکن تھاکہ جنوبی افریقہ کو اننگز کے مارجن سے شکست کھانا پڑجاتی۔ 176رنزکی شاندار اننگزکھیلنے والے کیوی کپتان کین ولیمسن کو تیسرے ٹیسٹ میچ کا بہترین کھلاڑی قرار دیا گیا۔واضح رہے کہ تین ٹیسٹ میچوں کی سیریز کا پہلا ڈونیڈن ٹیسٹ بھی ڈرا ہوگیاتھا جس کے بعد جنوبی افریقہ نے ویلنگٹن میں کھیلے گئے دوسرے ٹیسٹ میچ میں آٹھ وکٹوں سے کامیابی حاصل کرکے ایک ،صفر سے برتری حاصل کی تھی ۔