اْمت مسلمہ خلوص نیت کے ساتھ رجوع الی اللہ کرے:عبدالخبیرآزاد

لاہور (خصوصی نامہ نگار)بادشاہی مسجد لاہور میں شب برات کے موقع پر عظیم الشان اجتماع نے گڑ گڑا کر اور رو رو کر اپنے گنا ہوں کی اللہ تعالیٰ سے معافی طلب کی ‘نوافل ادا کئے اور رات عبادت میں بسر کی ‘اس موقع پر مرکزی چیئر مین رؤیت ہلال کمیٹی مولانا سیدمحمد عبد الخبیر آزادنے کہا کہ اْمت مسلمہ خلوص نیت کے ساتھ رجوع الی اللہ کرے اور فسق و فجور سے توبہ کرے‘ فسق و فجور سے توبہ کرنا سعادت دارین کا سبب ہے ‘ مولانا سید محمد عبد الخبیر آزاد نے کہا کہ کرونا ایک خطرناک وائرس ہے کرونا کی موجودہ لہر کے خاتمہ کیلئے اجتماعی توبہ اور دعاء کی جائے‘ اجتماعی دعاء میں رقت آمیز مناظر ‘لوگ رو رو کر اور گڑ گڑا کر گناہوں کی معافی طلب کرتے رہے ‘مولانا سید محمد عبد الخبیر آزاد نے دعاء میںپاکستان کی سلامتی ‘ افواج پاکستان کی مضبوطی ‘ملک کے استحکام اور وزیر اعظم پاکستان عمران خان اور ان کی اہلیہ کی صحت یابی اورمتاثرین کرونا کیلئے خصوصی دعا کرائی ‘ عالم اسلام اور کشمیر کی آزادی فلسطین کی آزادی اور مظلوم مسلمانوں کیلئے ظلم سے نجات اور حرمین شریفین کی حفاظت کیلئے خصوصی دعا کرائی گئی۔